臺鐵事故引心理傷疼 藍營:整合資源創輔導團體

臺鐵太魯閣號事故救難人員衝第一線救災，看著真濟血臊的畫面攏刻佇心內，國民黨智庫國家政策基金會14這工邀請專家開記者會，表示政府若是干焦針對受難者家屬、親友做個案追蹤是無夠的，著愛擴大重視全民的心理創傷。

羅惠群表示，這種心理創傷的影響可能會拖到5冬，尤其救難人員大部份是男性，受著傳統認為男性愛較堅強的觀念影響，壓力閣較大。雖然衛福部有男性服務專線，毋過敲的人實在無蓋濟，而且一通電話的幫助有限。伊認為政府著愛善用善款，參民間共同組織心理創傷的輔導團體，。

與會專家表示，全台目前有執照的諮商心理師大概四千位左右，人力不足，閣再以國立大學來講，學生平常時欲揣心理諮商著愛等甲兩個月，這擺事故也有師生受影響，資源定著會閣較食力。In是呼籲政府應該結合社區，建立心理輔導團體，補充人力。