職災保險法拚三讀通過 民眾黨:傷病支付愛100%

勞工團體推捒幾若冬的「勞工職業災害保險保護法」，行政院的草案3/18得欲佇院會通過，目標是佇立法院這會期完成三讀。台灣民眾黨團是對立法表達支持，毋過今仔日也提出家己的版本，in希望傷病支付率愛百分之百，勞工的職業災害照護嘛著愛給付。

前幾工仔再現劇團的團長黃民安佇演出期間雄雄過身，立委賴香伶強調，這也算是職業災害事件，針對「勞工職業災害保險佮保護法」草案最近可能佇行政院會通過，紲落來會佇立法院審查，民眾黨團也提出版本。

民眾黨認為這馬的職災支付，保費隨然是頭家納，但掠準出代誌，職災保險的支付干焦5至7成，另外3成名義上愛頭家出，但煞衍生出調解告訴等等的問題，認為單獨立法後的職災保險，基金的支付應該愛提懸到100%，另外針對小型公司、短期受雇的勞工，只要有工作的事實，就愛全面納保、投保的門路愛更閣較利便等等，希望予一寡藝術工作者，猶有八大行業的勞工，攏有保障。

針對民眾黨團提案的「職災保險法」版本，民進黨團幹事長劉世芳是表示，伊認為職災保險基金的支付率，可能嘛著愛分級較適當，毋過到底佗一个版本較適合，等待送入來立法院審查，攏會使閣再討論。