民謠金屬樂團恆月三途 走唱228.臺灣戰後的悲劇

有一位心理師，伊私底下閣有一个身份，就是民謠樂團的主唱。in舊年有第三張專輯，用1947年的臺灣社會做背景，共228的故事寫入內底，用音樂記錄這段歷史。


悲情的歌聲，佮iô-kún的節奏鬥搭做伙，台灣民謠金屬樂團「恆月三途」舊年新出一張專輯「噤夢」，以二次大戰了後國民政府來台前期的社會做背景，唱出彼當時人民拄著的生離死別(sing-lī sú-pia̍t)。

主唱周慕姿，另外一个身分是心理治療師，這擺的專籍是延續頂一張的故事，其中一條歌，孤燈微微，特別寫出228事件後的狀況，希望逐家透過音樂思考過去的歷史，共傷痛記予牢，莫予悲劇重演。

這張專輯的故事背景，選用早前的基隆港，也有特別的意涵。

一張專輯十條歌，聽起來有淡薄仔悲傷。這也是恆月三途樂團的第三張專輯。in希望台灣人會當透過歌謠，來追憶這段較早袂當講出來的悲歡離合。