潮州千人搝大索徙福安宮 場面鬧熱閣心適

屏東潮州的福安宮,已經有百外年的歷史,舊年才拄整修,煞去予人檢舉講,占用都市計畫的車路,廟方今仔日招一千兩百人來鬥搝大索,欲共規間上千噸的廟,徙來邊仔的空地仔。

現場千外位民眾,分做八組,逐家做伙搝大索,場面誠鬧熱。

斟酌看,廟寺下底的捲管,沓沓仔徒欲十公分,徙廟的大工程,總算是順利開始。

遮爾濟人攏來共伯公鬥搬厝,因為這間福安宮對日本時代,就是潮州在地的信仰中心,開發了後煞變佇路中央,舊年才開始欲整修,毋過因為徛佇都市計畫道路,可能愛拆除,廟方才決定共邊仔的空地租落來,欲共規間廟徙去新的所在。

廟方按算,短短四十米,規間廟閣轉斡90度,上無七、八工的時間,最後閣愛開一個月時間挖基礎固定,才算是完工,彼時陣土地公就有新厝通蹛。

九合一選戰解析

相關新聞