雲林六房媽會共金牌鎔做金仔 計共有258兩

登錄做國家重要民俗的六房媽過爐遶境活動，是雲林縣逐年的宗教大事，今年六房媽會，也共十外冬來信徒所捐的金牌提來鎔，變做成一塊一塊的金磚，這擺總共鎔258兩的金仔。另外，因為受著武漢疫情影響，今年的六房媽過爐遶境活動也取消，干焦進行簡單的神尊移駕儀式。


雲林六房媽會的人員共信眾寄付的金牌，一塊一塊提出來清點數量，準備欲共鎔做伙，真濟信眾嘛專工來現場觀禮。

理事長表示，過去就捌有人做過鎔金。這改是為著欲予信眾，了解這幾冬寄付的金牌數量，所以按算自民國97年到今，總共會當鎔258兩的金仔。鎔做規塊的金牌，未來攏會囥佇銀行金庫，等若有需要的時，才由委員會討論提出來使用。

原本一年一改的六房媽過爐繞境活動，嘛是國家重要的民俗活動。今年受著武漢肺炎疫情影響，六房媽繞境tsua̋n宣佈暫停。理事長表示，不得已配合政府取消繞境活動，目的嘛是希望會使保護信眾的身體健康。