食食按怎唸引討論 網友用台語讀較有臺灣味

台語台記者 鄭亞宣:「紅龜粿 筒仔米糕閣有這份蚵仔煎，若這寡臺灣的好食物，恁是用台語來講猶是用華語咧」

最近佇網路頂，真濟人咧討論，看著草仔粿這三字，應該按怎唸才著，有人會用華語讀，但也有人認為臺灣這寡小食，一定愛用台語來讀較有臺灣氣口。親像草仔粿、麥仔茶、蚵仔煎、割包和筒仔米糕、紅龜粿等等。

臺師大臺語學系系主任 許慧如:「是按怎有人會感覺講這寡物件愛用台語來講較有氣口，啥物是氣口，就是講聽起來才感覺講就是這个物件，就是因為這寡物件本來就是咧臺灣話的文化，佮臺灣話的環境發展出來的，所以看著粿這字你用中文去唸粿是毋是足奇怪」

老師講真濟所在攏有漢字，像廣東話、日本話。但這馬佇臺灣真濟人看著漢字，就慣勢用華語落去思考，干焦想著用華語讀，這和華語佇臺灣傷過強勢有關係。有客家族群表示，客語嘛有拄著這款問題。

客家台記者 曾靖珊:「像若佇阮兜彼爿就阮庄跤遐，若是講家己的母語點菜，頭家彼爿一定是聽有的，毋過佇外口的話就無一定矣，就變做講一定愛講華語，所以就習慣上就會按呢講，講家己熟似的像面帕粄(粿仔條)，米篩目(米篩目)按呢」

親像客話內面，草仔粿號做艾粄、麻糍號做粢粑、肉粽叫做粽仔，伊也表示，面對華語的強勢，就干焦賰佇客家庄才有機會講出遮的食物的名，伊嘛向望講若是食客家小食，會當用客話來點菜，會閣較親切。
記者 鄭亞宣 林郁凱臺北報導