國健署統計 國中生4成、高中生近7成捌啉酒

酒定會出現佇臺灣文化外交的場合，賣場嘛定看著啤酒咧促銷，品牌多元、甚至有各種口味，雖然佇咧廣告、抑是店家，根據「薰酒管理法」，攏著標示未成年禁止啉酒、買酒，毋過有民眾指出實際上賣場、店仔猶是無落實管制。

民眾 郭先生：「就是會看，抑是生甲較臭老的就袂問。」
民眾 陳小姐：「若是欲買伊閣有足濟方法，就是揣著方法去買酒，檳榔擔這類的，抑是kám仔店。」

根據國健署的統計，國中生有41.5%捌啉酒、高中生甚至有68.8%捌啉酒，主要會啉酒的原因，以厝內人、朋友啉酒綴咧啉的占上濟，嘛有歹勢拒絕、社交需求啉酒的。台灣戒酒暨酒癮防治中心指出，傷早啉酒恐驚會傷著腦神經發育，較會有情緒歹控制、記持bái等等的問題，中心呼籲政府落實未成年管制。嘛通參考日本的做法，酒除了愛寫度數，嘛著標示酒精含量，予一般民眾知影敢有啉超過衛福部的規範。

台灣戒酒暨酒癮防治中心主任 方俊凱：「咱臺灣是規定查埔20（公克）、女性10（公克）。準講無法律嘛會使有一寡，政府政策的決定會使加一个，幾公克佇咧酒精頂懸，這嘛會使講得；閣有咱佇青少年佇學校的部份，按怎來宣傳講莫較早啉酒，咱對薰、對檳榔、對一寡毒品，攏有咧宣傳，但是咱對酒的宣傳真少。」

中心指出大腦愛到25歲才會發育完全，嘛建議政府共合法啉酒的年歲，對18歲搝懸到25歲，避免少年囡仔提早癮酒。衛福部指出目前癮酒的治療補助，一人一年上懸有4萬箍，衛福部表示除了愛靠序大、學校協助囡仔建立正確觀念，未來嘛會根據臺灣的文化特性，研擬適合的防治策略。

記者 呂尚儒 莊浚佑 臺北報導