提過金鐘、金馬 林美秀出台語專輯閣入圍金曲

林美秀台語歌「烏貓」：「若想著彼个人，夭壽的笑容害阮面紅紅。」

穿一軀烏色洋裝、林美秀妝扮做愛嬌的烏貓，出現佇歌曲內底，這條探戈的舞曲，嘛展現出伊gâu跳舞的專長，林美秀的演藝生涯佇金鐘獎、金馬獎等等，攏提過最佳女配角，今伊出頭一塊台語專輯「Lady Pum Pum」做家己的主角，受著肯定入圍金曲獎。

金曲獎入圍者 林美秀：「愛唱歌你就無辦法你知無？定定攏去KTV遐去唱，想講通好留做家己做紀念的，寫一寡較臺灣的查某人的心聲予逐家聽。」

林美秀講食到50幾歲來到人生的半中站，就若像伊的歌「半燒冷」，經歷世事冷暖，伊欲用歌聲替查某人講話。林美秀是國光藝校舞蹈科畢業，一路來對伴舞，做到演員和主持，林美秀講伊的阿母佇伊事業成績愈來愈好的時、破病過身，所以袂赴予伊過好日子，佇咧專輯押後的歌名「來春」，就用阿母的名來紀念。

林美秀台語歌「來春」：「著時的含笑當清芳，不時插佇伊的烏頭鬃，春天伊一來袂畏寒，來春，一个溫軟的名。」

林美秀咧戲齣內底演過真濟人的阿母，毋過伊講遮的原型攏是對伊阿母的身軀頂看來的，伊共數念攏寄佇歌聲內，伊也向望透過歌聲、歌詞共伊的爸母語-宜蘭的台語腔保留落來。

金曲獎入圍者 林美秀：「謝銘祐老師就講我寫你的腔調，溫軟（nuí）就是阮宜蘭的軟軟，其實是溫暖啦。」

另外，講著這塊專輯的音樂風格，林美秀感慨濟濟早前臺灣歌的me-lóo-tih，像探戈、Disco、恰恰遮的，攏沓沓仔消失去，所以伊也希望透過這塊台語專輯，共遮的me-lóo-tih攏抾轉來。

記者 呂尚儒 莊浚佑 臺北報導