南臺灣工藝大展 200外件作品展現多元工藝

威風凜凜的門神，原本囥佇臺南陳德聚堂的倉庫內封存真濟冬，這擺修復了後頭一擺公開展出，是彩繪大師陳玉峰的落尾一件作品。閣有文化部指定的國寶級葉王做的廟尪仔〈七賢過關〉。另外這頂「帝帽」，規頂金光閃閃，是用手鏨工，絲牽銀線打造，幼路的手工通看著臺灣工藝的美感，這陣佇臺南生活美學館通看著。

工藝師 蘇建安：「阮是用鏨仔一鏨一鏨共鏨起來。伊雲跤的柳絲花，是用抽絲了後一輾一輾共轉起來，變成簍空的技法。」

臺南生活美學館長 黃瓊瑩：「有13種類別的工藝創作，然後工藝是上會使體現生活美學的表現。」

為著慶祝設館70週年，怹規畫《南臺灣工藝大展》，結合南部七縣市、81位工藝藝術家，攏總215件作品。這擺展覽閣有8位「人間國寶」，除了木雕大師陳啟村、閣有織布藝師許春美，伊對傳統織布轉化做現代禮服，其中布面絪纏的紋路，嘛代表人參人情感的交纏、相倚的意象。

人間國寶 許春美：「阮排灣族的織布有真濟意涵、文化意涵，規範攏寫佇織布頂面。所以我先共傳統的規範先做出來，然後才有後面的創作。」

人間國寶 陳啟村：「（鄭成功）伊的身材和伊的動態，咱是表現出伊是一个王者；姿勢嘛是仝款，就是表現出伊征服荷蘭人，共臺灣提轉來，這是一个真重要的歷史階段。」

臺南生活美學館講，這場展覽是近年臺灣罕得看著工藝盛會，無論是生活工藝、信仰工藝抑是美術工藝，每一件作品，攏是創作者對「美感」佮「生活智慧」的體現，嘛展現出臺灣工藝深厚的文化底蒂。

記者 李晨宇 臺南採訪報導