作家陳胤辦台語詩歌節 聽導覽、食咖啡講文學

「愈來愈狹的愛的路，賰一陣綿綿的bông-bông-á-hōo(濛濛仔雨)。」

壁堵掛滿一幅閣一幅的詩畫，攏是咧描寫愛的鹹酸苦汫，這是作家陳胤所寫的台語現代詩；伊原本是學校的老師，過去就定定用台語教冊，煞發見足濟囡仔聽無，予伊開始要意母語的保存，寫詩寫文章，專心投入台語的創作。

作家陳胤講：「對2001開始寫第一首台語詩，對遐開始，就開始算那想那寫那創作。我生活所接觸的物件攏是我創作的題材，所以其實我嘛主張咱藝術畫圖等等，其實攏愛佇生活內面釘根，按呢才有意義。」

除了創作，陳胤嘛四界展覽、擺攤仔，欲來推捒台語，今年也佇故鄉彰化辦台語詩歌節，有文學行踏、啉咖啡唸歌詩遮的活動，欲佮民眾互相交流，探討台語。

民眾講：「咱大部份講台語攏講甲袂輾轉，若會當共寫做詩，閣會當讀甲有詩的感覺，我感覺是誠好啦。」、「老師寫的台語詩的作品足有感情的，伊會共咱臺灣這塊土地，足深刻的歷史抑是人文地理，足有感情的表達出來，我看著足感動的。」

推廣台語的這段時間，陳胤發覺，台語詩的市草較冷，所以伊也會設台語過關遊戲、閣有文學行踏來唌人目。今年佇社頭舉辦的台語詩歌節，到四月初進前，逐禮拜攏有無仝活動，雖罔規模無大，但是陳胤表示，只要有人來參加，伊就會繼續辦落去，沓沓仔粒積，欲予台語的根愈湠愈闊。