2/21世界母語日 民團招在地店家辦台語活動

「按呢我欲一杯咖啡。」
「好，按呢我幫你點。」

人客用台語咧點咖啡，嘛有老師tshuā學生行出校外用母語咧點餐，講甲不止仔輾轉。2月21世界母語日欲到矣，台南基本款協會今頭擺串連府城14間台語友善店家，發起「台語日行動」，親像這間咖啡店，會主動參人客開講台語、用台語點餐，欲打造一个浸水式的母語環境，予逐家敢講母語、袂礙虐。

囡仔：「老師tshuā阮來遮買咖啡，就是學習欲按怎開喙講台語。（普通時仔你敢有咧講？）我是攏會參阿公、阿媽講台語。」

咖啡店營運經理 施姿均：「這馬少年家足少咧講台語，希望會使共咱母語捒來咱的咖啡店，予閣較濟少年家會當接觸著，學習咱台語這个文化。」

台南基本款協會指出，根據調查，臺南是六都內面講台語比例上懸的城市。這回毋但咖啡店，嘛有貓仔旅館加入，甚至連店名嘛結合台語來設計。另外，佇這間寵物病院，醫生嘛參人客用台語咧對話。醫生講，用台語看診顛倒予人較親切。病院嘛特別攢相關的台語詞，欲予逐家對台語較熟似，嘛推出優待，鼓勵逐家鬥陣講。

動物病院院長 陳俊良：「畢竟是咱的母語，希望講這个母語會使繼續存在落去；咱咧講的時陣嘛感覺足四序。」

台南基本款協會秘書長 吳依潔：「透過這个活動，會當提升逐家對本土文化的重視。希望未來嘛有愈來愈濟店家會使做伙參與；希望臺南市這个舊城市，會當變做一个足臺灣味的文化古都。」

協會表示，這陣嘛是有寡人佇外口講台語感覺無自在。這擺串連店家，就是欲創造親切、自然講台語的環境。怹講未來會閣透過各種形式來推捒，欲予台語一步一步行入逐家生活中。

記者 李晨宇 臺南報導