對囡仔歌研究臺灣文化 康原出冊說台語復興
發布時間：
更新時間：
音樂家施福珍所寫的《點仔膠》，是臺灣誠出名的囡仔歌。作家康原對1980年代開始研究施福珍寫的歌，對囡仔歌來看臺灣民間文化的底蒂，落尾伊也開始投入臺語囡仔歌、詩歌的創作，用音樂來表現臺語文學的媠氣佮內涵，用母語來記錄臺灣的生活故事。（新聞標題、導言及內文皆為臺語文）
「豬跤箍仔 滾爛爛 枵鬼囡仔 流喙瀾」
這首《點仔膠》，是臺灣音樂家施福珍的作品，作家康原受著施福珍的啟蒙，開始研究囡仔歌內底的臺灣民間文化，嘛投入台語囡仔歌、詩歌的創作，這陣伊共過去推動臺灣文學的經驗出版一本冊，記錄台語復興的過程。
作家 康原：「我有佮國寶施福珍老師做一寡仔合作。伊過去的歌攏是傳統的唸謠，我是透過伊傳統的唸謠，咧寫這唸謠中間的故事。親像普渡歌，普渡歌咧描寫啥。希望會當透過這个歌，去了解臺灣文化的底蒂。」
康原表示，1964年《點仔膠》這首歌拄發表，煞因為當當時政府禁止講台語的政策，所以袂當佇學校唱，為著保存臺灣語言文化，康原開始用台語寫詩、創作，希望民眾對文學來了解台語的媠氣佮內涵
民眾：「康老師是腹肚底有足濟故事、足濟文章會用得共阮講的，阮足愛聽的。」
民眾：「（我有咧接觸）台語文學的創作的時，我發現足濟字的押韻，有夠媠的，所以學台語真正是愛對細漢開始。」
康原表示，伊一路見證台語對予人壓制到成做國家語言的艱苦過程，雖罔這陣台語開始受著重視，但是伊認為進步傷慢，向望會當早一日成立台語的專責單位，對家庭、學校、各所在落去推動，才袂予台語的傳承出現斷層。
記者 楊舒晴 彰化報導
唐嘉良/編輯
