佳里八家將傳承百年 成做臺南無形文化資產

臺南佳里、吉和堂八家將、已經傳承百年，2009年予臺南市政府登錄做無形文化資產，進前廟拄著火災損害去，經過11年籌建，新廟已經落成，各地頭嘛有真濟無仝的家將團來交流，最近in也參大學合作，傳承家將文化、培養將跤。


家將佇廟口跳兩儀四象的陣法，無講掠準是專業人士，其實in是大學生，這回頭改對外表演袂懍場閣真有範。這是臺南佳里吉和堂參成大歷史系鬥陣開設課程，教少年人毋但看文化的內涵，兼實際教in畫面譜、學習跤步手路。廟方講，因為這是表演性質，加上這陣性別平權，致使佇團體中嘛通看著女性來參加。

成功大學學生表示，我以查某囡仔的身份，有寡時陣佇廟會就會有一寡阻礙，上這个課了後我就發現一寡東方人的姿體。

閣有成功大學學生嘛講：「細漢就是佇邊仔看爾啦，這馬佇內底按呢演、學八家將的文化，是真正無簡單。」

佳里吉和堂助理教練王俊龍講，「阮這團大部份攏是跳陣法，有个是兩个兩个做伙跳，阮會通常攏是後壁四大神參四季做伙跳。」


吉和堂家將團到今傳承上百冬，2009年登錄做臺南市無形文化資產。毋過廟佇2013年煞不幸火災，廟方拚勢重建，新廟初九總算圓滿落成，毋但有吉字派的將團來，就連外縣市的古桃城山海鎮什家將、桃聯廣澤會舘八家將等攏來慶讚，嘛予鄉親一改通欣賞多元的面譜參步法，這若像一場嘉年華。

佳里吉和堂主委陳席閔講，「阮對零開始、完全無錢，靠全國按呢落去募款，阮家己堅持阮該堅持的文化，毋但希望恢復以前的光景，甚至予較濟人會當來接觸家將的文化。」
 

臺南市文資處處長林喬彬講，「廟重建代表tshuā家將團的據點重新建立，in佇咧廟重建的過程中，嘛共傳統工藝的心血囥入去。」


佳里吉和堂講，in這團就有十幾種無仝的陣法、會依照無仝任務落去跳，後續會參市府等單位合作，向望減少逐家對家將的誤解，嘛培養新世代的人才。