研究：臺灣人7成母語是台語 踮厝會講的無3成

母語參本土文化有真深的關係，但是根據台灣師範大學的調查，台灣有7成的民眾，家庭母語是台語，但是只有無到3成的民眾，踮厝內會用台語對話。學者認為這是咱教育主重華語造成的，應該對各方面、營造母語環境。

農村武裝青年主唱江育達，佇金音獎頒獎典禮講：「民謠哪有可能無土地，土地哪有可能無母語。」
今年金音獎最佳民謠歌曲獎著獎人「農村武裝青年」，也講著母語參本土文化的連結性，鼓勵逐家共母語抾轉來；實際上訪問民眾，濟濟人會因為溝通方便，毋但外出講華語，佇厝內嘛無啥咧講台語。

民眾張小姐表示，「佇咧厝內爸母有時陣會、有時陣袂講台語，因為大部份猶是慣勢講中文。」
民眾許小姐嘛講，「只有阿公阿媽會講台語，我會曉一屑仔、但是較少，若講著方便猶是會用國語(華語)」

臺師大文化教育策略研究團隊電話調查千外人發現，有超過7成的民眾，雖然家庭的母語是台語，煞無到3成的民眾，會佇厝內講台語。另外，有超過6成的民眾認為，佇厝內的語言習慣，會影響咱對原生族群文化的認捌程度。

臺師大文化教育策略研究團隊計畫主持人國文系教授鍾宗憲表示，「因為臺灣現實的狀況是族群真濟，加上啥 加上國語(華語)的教學，帶來的影響，所以平常接觸的語言就是國語(華語)，官方的場所公共正式的場所，因為啥物族群攏有，所以咱當然用共同的語言。」

學者認為，政府通試咧以影視、音樂、旅遊做媒介，推捒母語環境。伊嘛指出，雖然這馬學校有本土語言課，但是對學生仔無蓋有吸引力。政府若通輔助母語戲劇、音樂創作，閣有本土文化旅遊路線開發，用較軟性的方式，有機會予閣較濟人親近母語，接受母語。

記者 郭柏均 林郁凱 台北報導