數位出版盜版濟 若欲檢舉、消費者愛家己舉證

數位時代，咱通好佇網路聽廣播、看影片，甚至有電子冊、有聲冊。這寡作品煞有盜版集團提來做無本生理，用俗價轉賣予消費者。毋過立委咧質詢文化部的時，講目前的處理程序，是愛受害者家己開錢買證據向警方舉證，文化部回應講會研議積極的對策。

數位時代有真多元的影音創作，出版業嘛做誠濟電子化商品，比論電子冊、有聲冊等等，10/23有立委咧質詢文化部的時，就指出濟濟創作者的心血攏變做盜版集團俗價轉賣、趁烏心錢的目標，但是目前的對策是愛受害者家己開錢買證據向警方舉證，立委認為這真無合理，嘛批評文化部態度消極應當改進。

民進黨立委陳培瑜表示：「文化部基本上會使積極協助智財局去認定遮的物件（盜版），智財局會當閣進一步邀請數發部做出數位阻擋的代誌，然後刑事警察局的報案當然是同步愛進行。明明就有相關手法，毋過文化部的態度一直真消極。」

盜版的網站內底，毋但有前總統蔡英文的有聲冊，閣有知名數位學習平台的課程，盜版賣的價數和正版比起來俗欲20倍，立委就批評盜版集團做這款無本生理，嚴重傷害臺灣的內容創作產業，文化部是回應講會積極研議對策。另外，有學者指出像這寡賣盜版的網站，政府著積極迒國協調合作。

世新大學廣電系兼任副教授何吉森表示：「愛證明講你有影著作權受著侵害，然後愛經過一定的程序，由相關行政命令抑是司法面做相關的措施，要求遮的電信公司莫去解讀盜版網址內容，這是這馬較新的做法。」抑若境內的部份，伊嘛舉南韓做參考例，in有設立防制盜版的專責行政單位，主動監控、查緝盜版。學者表示這款盜版的手法愈來愈濟，向望政府通對各方面積極面對，維護臺灣的創作環境。