臺南金興宮請水聖地 有人偷倒欲50噸糞埽

廢棄的塗沙、木材佮塑膠品予人擲甲滿四界，這毋是糞埽場煞有大量廢棄物囤甲若山，臺南將軍區金興宮白礁亭遮一半是廟地，一半予政府徵收做使用，這陣煞有人佇遮烏白倒將近50噸的糞埽，在地居民推測這應該是佇別搭囥甲爛去才閣運來遮，認為這種行為實在傷過譀。

在地居民講：「這搭遮溪邊攏會有人來偷倒，但是毋捌倒遮濟啦，這一定是人別位趕，伊才閣車來過來偷倒的。（記者：這馬閣有漚味就著？）是啊是啊。」

將軍金興宮主委林銀王講：「阮昨昏去查資料就是，（民眾）去遐釣物件講，就是欲拜五暗拜六早仔三點外，有看著人佇遐咧倒。」

金興宮是地方大廟，這回誠要意這層代誌，主要因為每冬便若大道公聖誕，in固定會去白礁亭邊仔的溪岸做請水佮調兵將的科儀，落尾才閣提轉去廟內內殿囥。今這陣連神明的請水聖地嘛有人敢烏白舞，市府指出，相關單位已經咧調查。

臺南市將軍區公所區長許博森講：「將軍溪邊嘛算是防汛道路，嘛是市府的土地，權管單位是水利局，阮嘛有通報水利局，市府環保局相關單位阮了解以後，in禮拜嘛已經來現場勘查。」

臺南市環保局稽查科長張仕音講：「目前當咧調相關的電眼查證當中，現場嘛已經採樣收驗，後續若查著行為人，會依照違反廢棄物清理法移送地檢署偵辦以外，嘛會罰600萬以下罰款。」

因為所在較揜貼閣加上附近並無啥物電眼，公所講，後續會閣參市府討論來增設監視器，防範按呢的情形閣發生。