提升囡仔學本土語的興趣 母語團體分享經驗

「這馬本土語課一禮拜40分鐘，有的課本上課才分落，下課閣收轉來，有的閣敆班，等攏處理好差不多五分外鐘閣了去矣。」

雖然國家語言發展法佮108課綱，保障學校一定有本土語課程，但是時間短、節數少、社會也無重視，真濟學校的本土語老師講，囡仔因為按呢無願意學。

國小本土語老師表示：「華語家庭生活上無彼个機會通好講，所以有的聽無，伊就 (上課時)做伊家己的代誌。」

也有國小本土語老師講：「這馬囡仔講台語的情形，並無足普遍的，爸母若講無咧講，𪜶講的機會較少。」
有國小本土語老師李小姐表示：「我的囡仔攏無欲講台語，我馬是感覺誠頭痛。」

新竹市本土語推廣協會的游沛綺，佇國校仔教四冬台語課，伊發見台語課若結合時行話題，囡仔就真有興趣上課；游沛綺也開課分享予其他老師，設計創意教案。

新竹市本土語推廣協會常務理事游沛綺分享：「進前黃仁勳來臺灣的時陣，我就講伊是按怎一直佇咧本國、抑是國外的記者頭前一直講台語。」「一年仔就是較坐袂牢、較愛耍，所以你課就是設計愛較活潑咧，較濟振動；國中了後𪜶開始面對家己的人生，可能有一寡嘛會有一寡，可能想欲戀愛彼款的，所以你愛了解𪜶的心理，閣有佮意流行這个部份。」

游沛綺講，愛以「人本」的理念設計課程，對囡仔的角度出發，思考啥款內容會吸引學生仔的興趣、願意聽課學台語。游沛綺講，按呢老師就免教甲摔筆，囡仔對台語也學了開脾。