第2屆歌仔上青 全國歌仔曲調大賽8/1起報名
發布時間：
更新時間：
國立傳統藝術中心今年舉辦第二屆，歌仔上青全國歌仔戲曲調大賽，八月初一開始報名囉，今年特別增加團體組，鼓勵序大通tshuā著後輩抑是少年家組隊來參加，向望全民做伙唱歌仔。（此則新聞標題、導言、內文皆為臺語文。）
「唱予大聲！」
由歌仔戲界天王，唐美雲佮陳昭香領唱，歌仔上青的主題歌，徛佇後壁這14位是舊年比賽的得獎者，in對少年輩到專業演員攏有。歌仔戲是台灣重要的戲曲，濟濟參賽者自細漢著受著序大的影響，到今大漢矣，嘛希望對傳統文化的推廣盡一份心。
舊年歌仔上青專業組冠軍張閔鈞：「佇爸母的身軀邊學歌仔戲，所以歌仔戲算起來是我的根，嘛是我足熱愛的工課佮興趣。」
舊年歌仔上青少年組第三名藍士軒：「自兩歲就佮阿媽看歌仔戲，阿媽就發現，為啥物我佇厝內面攏嘛嘛吼，看一齣歌仔戲嘛有三點鐘(時間)。」
今年的比賽閣延續舊年，除了有少年組、成人組佮專業組，閣特別增加團體組，鼓勵序大少年通組隊來比賽。另外今年閣推出歌仔上青的主題歌，以現代曲風為主，予一般民眾通用流行歌的方式來接觸歌仔戲，文化部表示講，學台語上好的方式就是唱歌仔，比賽是欲予閣較濟人佮意歌仔戲。
文化部政務次長李靜慧：「欣賞歌仔戲、唱歌仔戲調的時陣會使學咱的台語文。」
臺灣歌仔戲推廣基金會董事長林茂賢：「真正毋是欲比賽，是欲予逐家攏來唱歌仔戲，因為會曉唱歌仔戲的曲調，伊佮歌仔戲就有連結，伊後改看著歌仔戲的時陣就有興趣。」
今年歌仔上青全國歌仔戲比賽，初賽報名是對八月初一開始，向望透過比賽，用趣味活潑的歌仔戲，予傳統文化會當繼續傳湠。
記者 鍾依憓 邱紹揚/高雄報導
曹詠涵/編輯
