閩南語正名臺灣台語 客家人不滿文化部論壇

客家鄉親大聲喝：「語言平權，族群平等。」

國家語言發展會議外口，60外位客家鄉親攑標語，抗議文化部主辦的第二屆國家語言發展會議(簡稱語發會議)，無客語和原住民語的場次，嘛不滿教育部最近共臺灣閩南語改做臺灣台語。

中央大學客語學院榮譽教授羅肇錦講：「臺灣客家語就叫做台語、臺灣閩南語也叫做台語、臺灣原住民語也欲簡稱台語，遮簡單遮清楚的代誌，結果𪜶另外號臺灣台語，來等於河洛話，這是客家人感情上無法度接受的。」

文化部也接收抗議書，針對客語和原住民語的專場，文化部表示，客語會交予客委會負責，原住民語原民會會處理，臺灣台語、馬祖語、台灣手語無專責單位，所以交予文化部來辦理。

文化部政務次長李靜慧表示：「咧分區論壇的時陣，猶是應該集合各部會的力量，做伙共分區論壇辦甲愈周至愈圓滿，阮會加開客語的專場，嘛會加開原住民語的專場。」

毋過有客家族群少年家，講伊支持用臺灣台語的名稱呼家己的語言，希望弱勢語言之間莫閣互相傷害。台語團體嘛出面呼籲，無仝的族群語言應當同齊徛佇語言流失的陣線，來思考欲按怎傳承和復振才是上要緊的。

客家少年家黃泳玲認為：「我認為講這馬，已經無遐爾大的族群的分裂矣，恁(客家前輩)按呢做，其實會變做予阮序細，愈無認同家己的文化身份，恐驚阮會愈無認同家己是啥人。」
台灣台語路協會理事長董力玄講：「這馬咱攏共同面對流失的危機，其實咱是仝款的。問題的重心，應該是愛囥佇咧欲按怎佇目前這个『國語』獨大的情形之下，去爭取咱這个族群語言的復振。」

另外，針對2024年的國家語言發展會議，有部分台語團體認為文化部攏無啥物咧宣傳和說明，in不滿這款潦草的做法，希望文化部咧面對語言發展的種種議題和活動愛愈幼路，避免族群之間產生誤解。