捷克「中歐作家閱讀月」 臺灣列做亞洲主題國

臺灣作家 向陽(林淇瀁)，「竹林、茫霧佮山埔，猶有輕聲細說的溪水，世界恬靜落來的時。」

臺灣作家向陽，台語詩讀煞以後，得著濟濟捷克民眾的噗仔聲。捷克的作家閱讀月今年25周年，臺灣是主題國，七月每一工攏會有一位臺灣作家來分享。7/11向陽就佇捷克分享台語詩，這首詩「世界恬靜落來的時」寫佇1998年，後來上無有10位音樂家為這首詩編曲。伊嘛共改編的音樂，放予現場的觀眾聽。

「世界恬靜落來的時 就是思念出聲的時」

向陽嘛透過音樂性，向捷克的民眾分享台語的七聲八調。伊認為通用這個場合，予外國人了解臺灣的族群、語言、文化等等，是世界認捌臺灣真重要的入口。

民眾，「予阮看詩佮聽詩，閣來伊嘛有解說，對我來講這是上趣味的部份。」

臺灣作家 向陽(林淇瀁)，「臺灣台語、臺灣客語，或者是臺灣原住民族的語言，這馬攏是國家語言，咱以後若派代表過來，會當加派各種無仝款母語的作家，具有代表性的作家，按呢就會當閣較，予人了解著講臺灣確實是一个多元，語言也好或者是文化也好，有誠濟無仝款表現的一个國家。」

另外，向陽嘛透過伊的詩，來分享臺灣的歷史、和白色恐怖等等。因為捷克捌經歷過共產黨的威權統治、佮蘇聯的鎮壓，濟濟民眾攏真好奇臺灣過去彼段威權的歷史。

民眾，「這和阮共產主義的歷史誠成，對我來講這是印象上深的部份。」

臺語台記者呂尚儒，「佇捷克主辦的作家閱讀月，自7/1到今已經十幾工囉，主辦方是表示講，每一場台灣的分享攏來袂少人，抑若向陽是指出講，佇咧捷克ﰀ的文學風氣，有通好發展到按呢，是經過幾若十年的累積，以伊相信講咱的臺灣文學，只要繼續拍拚落去，就有機會共咱的文學，推展到每一个所在。」