彰化幼兒園編台語繪本教材 國教署評選佳作
發布時間：
更新時間：
臺灣規年迵天攏有出產果子，毋但種類濟、氣味閣好。為著予囡仔熟似台灣豐富的物產，彰化有幼兒園特別編一套繪本教材－好食的果子，用互動式的問題，幼囡仔咧讀繪本的時，就會當真自然用台語講出果子的名，這本繪本嘛得著今年國教署本土語教學教材佳作的肯定。(本篇新聞標題、導言、內文皆為台文)
囡仔人綴老師，一句一句大聲講出果子名，有弓蕉、檨仔、閣有彰化出名的大村葡萄參社頭菝仔，這是彰化縣大村鄉大西幼兒園，家己編的台語繪本教材，繪本設計者張琬甄老師，用趣味有節奏的語詞，予囡仔自然講台語
大西幼兒園老師 張琬甄：「我的冊是用較簡單的方法，囡仔較定定看著像果子加入一寡仔色水，閣有單位的名予囡仔去熟似。定定講、定定聽、定定看，in就知影嘛足好記的。」
大西幼兒園，五年前就開始營造浸水式的台語教學環境，除了果子的台語繪本，嘛有設計上課歌、樹仔的唸謠等等，幼兒園表示，教材內容若佮生活經驗有連結，囡仔咧學台語就真緊
大西幼兒園園長 謝淑君：「其實阮真正是做浸水式的台語，就是對生活當中教囡仔去講，譬如講gâu早、食飽袂、再會。這攏是平常時仔會講著的語言，按呢去引導囡仔沓沓仔去講台語，予囡仔袂感覺這件代誌是足困難的。」
幼兒園表示，幼囡仔時期是學語言真關鍵的階段，透過生活對話、趣味的繪本、歌謠遮的方式，予台語成做生活語言，嘛鼓勵家長序大加佮囡仔講台語，對學校到家庭做伙營造多元友善的語言環境。
買湘瑩/編輯
