中研院全台語講座 頭場談臺海安全、臺灣地位

這幾年文化部大力推動台語主流化，佇影視創作、藝文表演、台語活動等等，攏有提供補助。為著欲推動學術的討論，中研院的社會所、歐美所佮法律所，嘛邀請濟濟專家學者來辦台語講座，就叫做「台灣當前挑戰系列講座」。

中研院社會所長 陳志柔，「針對目前臺灣要緊的問題來討論，阮邀請的專家安排的題目，包括法律、政治、社會、教育、歷史各方面，阮希望講按呢的活動，會用得推動學術的討論，咱看電視毋但立法院，猶有研究院會用得看。」

14討論的主題是「台海安全中的美國角色」，由中研院研究員林正義主講，和東吳大學潘欣欣教授對談。學者指出臺灣佇半導體、AI的國際地位，是國際關注印太區域安全的一部份，咱嘛愛防衛中國非常規部隊的威脅、認知作戰等等，嘛呼籲政府一定愛注重國防，予國際看著咱保衛家己的決心。

中研院歐美所研究員林正義，「若準講臺灣佇國防預算來減少，抑是咱對咱家己的安全無在意，對欲幫贊臺灣的一寡國家，ﰀ是認為講愛閣考慮，因為這是一个足現實的問題。」

東吳大學社會系教授潘欣欣，「逐家足煩惱就是講敢會有第三場，佇東亞這爿戰起來，所以講咱民眾一定愛特別注意，特別是講中國這馬經濟愈來愈敗害，煩惱就是講，伊敢會利用戰爭來去轉移，閣來伊煩惱的代誌。」

兩位學者攏講這是怹頭一改用台語來講台海議題，表示欲共學術名詞講予民眾了解實在無簡單。中研院社會所所長表示，到明年1月、紲來半年猶閣有12場講座，內容真豐富，除了提出各種議題的分析佮政策建議，嘛希望實踐用台語來講萬事萬項，民眾透過台語台的Youtube也會當看直播。