日本動畫「工作細胞」 電影推出臺語配音版

台語版動畫電影「工作細胞」，伊竟然佇遮食普林

乳酸菌當咧食普林，食甲歡喜甲。這齣是日本誠衝的動畫「工作細胞」的電影版，經過中教大台語動畫團隊，重新配做台語版。故事設定是共無仝細胞畫做人的形體，予逐家知影怹佇咱身軀內按怎運作。長期推動動畫台語配音的教授程俊源表示，像這寡科普類型的欲翻譯攏著請教百工百業的專家。

台中教育大學台語系教授程俊源，「不管按怎攏是去請教真正現場，像醫師、藥師抑是化學專家，抑是讀醫學背景的，阮攏共所有遮的術語共整理出來，予怹共阮檢討講這按呢翻譯是著抑是毋著，最後就是恁看著的按呢。」

事實上教育部自2017年開始，就委託中教大執行動畫的台語配音，包括櫻桃丸仔、異世界藥局等等，攏總有14齣台語版的動畫。另外，公視台語台自舊年嘛推出台語版的派對咖孔明、和間諜扮公伙仔，引起濟濟討論，長期關注台語文作品的鄭順聰認為，用動畫來推廣台語，範圍會當湠愈闊。

臺文作家鄭順聰，「派對咖孔明的短片仔，囥佇網路幾十萬人咧看，只要放出去足濟人看，所以會當湠出去原本的台文界，抑是干焦講台語的族群，會當共咱的台語台文湠出去，這是足重要的。」

鄭順聰認為台語著愛慢慢仔行向生活的全面化，毋但動畫做台語配音，政府嘛應該加投入資源來做電視劇、電影等等的台語配音，按呢才會當予愈濟人透過無仝作品類型來接觸台語。