新竹光武國中周邊車濟 閣無設人行道真危險

新竹市光武國中門口就是倚近新竹科學園區的光復路，長年攏無學生的通行空間，用路人行佇車輛來來去去的大路頂，看起來實在有夠危險。

學生家長，「光武國中的囡仔，是愛行佇車道，佮車輛相櫼，阮想欲改變的就是，用車道縮減的方式，予空間重新配置。」

校長講，上下課時間，學生攏行在車路頂頭，予人真不收心，應該趕緊想辦法解決。

新竹市光武國中校長 黃信騰，「佇道路頂面的風險，相對懸真濟，這是目前光武國中佇放學時間，囡仔佇通行 實際上拄著的問題。」

新竹市議員蔡惠婷，「學生逐工上課咧行的路，因為邊仔閣有店家停車需求的關係，人行道就一直無法度設，阮希望新竹市政府想辦法，來想出會當兼顧的需求。」

議員嘛講，過去辦過袂少改的會勘，毋過攏無結果，要求市府交通專案小組應該提出實際的改善計畫。

新竹市交通處綜合規劃科長賴冠豪，「學生、用路人行佇車道，其實是足危險的，所以短期內會來研議評估，敢有空間會當來畫標線人行道，阮嘛會佇最近的交通改善小組，提出來參委員討論。」

交通處表示後續會揣專家學者討論，短期內先做標線行的人行道，才閣進一步來研究解決辦法，予學生有一个上下課安全行路空間。