臺南冬節包菜粿祭祖 佳里社區動員傳承文化

先共秫米皮研予平，才囥入模仔內底包餡，參市面上看著的菜粿真無仝，臺南部分地區每若冬節欲到的時，家家戶戶攏會包菜粿來祭祖。毋過，近來會曉做的人愈來愈少，為著傳承這項有上百冬歷史的文化，營頂社區關懷據點請老師來教社區序大，共在地的好滋味保留落來。

在地居民講：「過去遮的老輩就攏有教阮的，我自細漢做甲這陣矣，就是愛拜按呢拉。」

營頂關懷據點理事長莊永良說明，「做菜粿原仔有伊的意義存在，第一祭祖冬節到矣，就是欲過年添歲、保平安大發財。」

拄炊好的菜粿有黃色佮茄仔色，社區是用金瓜.番薯在地食材落去做，詳細看外型閣參元寶略仔相☒，所以每若冬節IN攏會攢來欲拜祖先，這嘛成做遮節慶限定的點心。有經驗的序大咧包的跤手真猛，毋過有時嘛是會重耽去。指導老師講，若皮有破去一定愛補予好勢，無破角才代表圓滿。

指導老師謝寶蓮講，「啊破去就是愛補，用粿粞閣落去補，所以人咧講的補粿較有家伙。」

序大講，冬節食菜粿甜甜鹹鹹真著味，這改IN攏總包800粒，嘛會分送去予較弱勢的長輩，予IN做伙感受過節的氣氛。