「嘉藝36技」新冊出版辦展覽 傳承傳統真工夫

梅山鄉的竹編、塗礱，太保市徒厝的工夫，大林鎮的布袋戲尪仔杉，來自嘉義縣18鄉鎮，計共36位傳統技藝的工藝師，用生活佮信仰兩個主題，做伙佇嘉義縣中埔穀倉農創園區舉辦展覽。

磚雕工藝師戴葦喬講，「一直欲失傳去的技藝、老的傳承、新的發掘，甚至講，予in有新的價值」

布袋戲尪仔杉工藝師曾許庭琇講，「保存這文化，這馬這傳統文化較少。」

嘉義縣文化基金會用四冬的時間，替36位工藝師，翕18齣紀錄短片，閣整理完整的資料、編做冊，欲來送予縣內的學校，希望傳承在地的文化資產。

廟宇修復工藝師李志上說明，「會使經過咱這改的展覽，會使予一寡少年的了解講，咱過去已經強欲忘記的技術有偌濟，猶若少年的有想欲來了解，其實咱這个藝術就會使，沓沓仔流傳落去。」

嘉義縣文化基金會執行長陳尚雍補充，「有一寡技藝伊可能強欲失傳，阮希望透過這个展覽，藉這本出版的冊，會當予序細知影講，嘉義縣其實誠有文化力佮軟實力。」

文化基金會講，展覽對10月初6，一直到10月15，除了展覽實際的作品，會場內底嘛會放送工藝師的紀錄短片，希望替民眾對傳統技藝帶來閣較深的認捌。