5月開放同婚共同收養無血緣囡仔 今裁定頭例
發布時間：
更新時間：
佇今年五月立法院修法開放同性家庭共同收養無血緣的囡仔。佇過去同性家庭干焦會當透過其中一人的名義去收養囡仔，另外一个人無法度有囡仔的親權。佇修法了後，今仔日有一个同性家庭總算予法院裁定通共同收養囡仔，成做修法了後的頭一例。（此則新聞標題、導言、內文皆為臺語文。）
同性家庭怡如佮怡伶，過去因為法律的限制，無法度共同有囡仔的親權；一直到今年五月，立法院修正「司法院第748號解釋施行法」第20條，開放同性家庭「共同收養」囡仔，24法院總算裁定，兩人通共同收養囡仔。長期幫助in的民間團體表示，in是修法了後頭一个成功共同收養的同性家庭。
彩虹平權大平台執行長鄧筑媛表示，「咱2021年4月第一審予人駁回，閣愛抗告到第二審，第二審的法官也經歷過開庭，咱愛去說服法官。」
佳哉in有等著修法；佇怡如怡伶進前，只有同性家庭圍爸、喵爸透過拍官司，佇猶未修法的時成功收養無血緣的囡仔。毋過這陣同性家庭若是欲家己生囝，猶是有難關。
彩虹平權大平台執行長鄧筑媛表示，「女同志雖然家己有子宮，但是臺灣的同志猶是愛提行李箱，出國去做人工生殖，無法度佇臺灣做，未來咱就是希望人工生殖法，會當修法。」
目前臺灣人工生殖，只有開放予袂生的夫妻做，所費15萬到40萬；同性家庭若想欲做，就愛開2倍到3倍的費用、去國外做；若男性組成的同性家庭，閣會牽涉修法開放代理孕母的問題，民間團體表示，遮的困難攏是未來in欲拍拚的方向。
熊楚瑜/編輯
