新臺劇「八尺門的辯護人」 討論語言平權議題

阿美族的公設辯護人為著欲幫來自印尼的漁工，犯的殺人案辯護，真無簡單揣著，會曉印尼方言瓜哇話的印尼看護來鬥相共。臺語、印尼方言、阿美族語、華語佇這齣「八尺門的辯護人」中，聽起來攏真輾轉、真自然，作家廖玉蕙呵咾講，這齣戲的演員對語言，下真濟功夫。

作家廖玉蕙：角色每一个對語言的掌握攏真厲害，我知影按呢真辛苦。聽𪜶說其實攏是新學的，聽起來真寫實。

八尺門的辯護人男主角李銘順是新加坡的演員，戲中的印尼移工，多數攏是臺灣演員，導演嘛是這本小說原創的廖福睿講，伊一直共「語言」看做故事的重要元素，無法度以多元的語言完成小說，是伊真大的遺憾，所以他共小說改寫做劇本，嘛要求演員愛做到母語程度的演出。

導演唐福睿：這其實是當初咧寫小說的時，我就很在意的物件，我感覺語言是臺灣，這个社會真值得關注的代誌，因為咱有多元的文化，無仝的移民、使用無仝的語言，我感覺這件代誌，是通透過影劇來共伊呈現出來。

導演講，臺灣已經是一个多元族群的所在，伊嘛相信只要表現自然，觀眾對無仝語言的接受度真懸，唐福睿捌做過五六年的律師，過去佇法庭上，伊嘛深刻體會語言的使用，象徵權力、文化、佮認同，伊嘛想欲透過戲劇，予逐家思考「語言平權」。

導演唐福睿：法庭的溝通，有真大一部份的程度，攏必須愛用華語才會當順利進行，使用少數語言的族群來講，其實這就是一个落差，伊就是一个權力的落差。

導演認為，目前社會種種的議題，攏無法度跳脫族群、語言來思考，伊未來嘛會繼續用上在地氣口、各種無仝的語言來創作，忠實傳達臺灣社會的多元文化。