明華園改編胡撇仔 新創蹛家齣「青蟬」講親情

趣味的劇情，這是明華園總團2023的全新帶家齣《青蟬》，改編六十年前的胡撇仔戲《母性愛》，故事背景是明朝嘉靖帝為著追封親生老爸興獻王所引起的爭議、做故事，用全新的舞台演出，表達出家庭之間的感情線

明華園總團小生孫翠鳳表示：「古早的戲齣，伊的精華佇佗位保留，但是愛用新的角度，共伊加入這个精神，所以這擺對逐家來講，蓋成一齣新的戲欲開始。」

這齣戲全場無使用電子的投影設備，專工揣出古早的全手工畫的布景，對舞台、音樂、道具設計，項項攏誠斟酌

明華園總團團長陳勝福表示：「佇導演的要求，希望愛百分之百的原汁原味，咧做的過程，咱無可能去拍鐵仔去磨一支刀，但是這馬做出來的刀，愛予觀眾感覺講，彼支刀剖落真正會受傷。」

為著符合現代人看戲的慣勢 ，明華園將十天的胡撇仔連本大戲《母性愛》改編做兩點鐘的《青蟬》，目前國內疫情穩定解封，團長陳勝福也期待未來民眾多多行入劇場，感受傳統戲曲的魅力。