國家廣播文物館展古董 招民眾了解廣播史
林緯廷 / 嘉義報導
發布時間：
更新時間：
1940年來完工的國家廣播文物館，以前號做臺北放送局、民雄放送所，到今內底，猶閣有保留真濟古董的廣播設備。為著欲予民眾會當知影過去的歷史，館方今嘛，舉辦各種活動，希望予國家廣播文物館、成做文化交流的平台。(本則新聞標題、導言、內文皆為臺文)
紀錄片放送香港人移民台灣的生活，導演嘛分享拍片的過程。嘉義縣民雄鄉的國家廣播文物館，佇拜六禮拜舉辦活動，邀請新住民來分享佇台灣的生活。
在臺港人 曾志豪：「以前遮的廣播對象可能是對岸，但是我感覺這馬可能是全世界。特別是香港佮臺灣連結起來以後，敢有啥物新的看法，所以來到民雄這个所在，我感覺希望會當有廣播擴大放送的效果。」
民眾 黃先生：「遮有實境遊戲，今仔日閣有港澳的交流分享會，另外閣有多元族群的市集。我感覺這其實佇咱民雄有遮爾仔多元的環境，其實足好矣，因為阮囝嘛是澳門人佮臺灣人的結合。」
除了新住民的講座，國家廣播文物館內底，嘛展覽誠濟彼當陣留落來到今的古董設備，配合活動的設計佮體驗，予人會當來認捌彼當陣時代的背景佮廣播對社會的影響。
中央廣播電臺副總臺長 李明俐：「咱這个國家廣播文物館進前是中央廣播電台前民雄分台，較早佇日本時代是日本對南洋廣播的一个所在，佇咧戰後，成做中央廣播電台對東南亞廣播一个基地。」
國家廣播文物館講，1940年彼當陣使用的電台發射機，到今閣保留佇這个所在，所以文物館毋但有過去的歷史，嘛希望透過多元的合作，予這个舊廣播基地，未來會當繼續傳播新的在地文化。
買湘瑩/編輯
2022杭州亞運 台灣百金之路
