臺南文夏故事館開幕 紀念寶島歌王音樂成就
李晨宇 / 臺南報導
發布時間：
更新時間：
寶島歌王文夏，規世人為台灣音樂拍拚。舊年4月、伊佇睏夢當中過身，伊的一生，會當講就是一本台語歌的發展史。現此時臺南市政府佮文化部，佇文夏的故鄉麻豆，成立文夏故事館，佇咧今仔日開幕，文夏的牽手文香，也出席開幕典禮。(這則新聞標題、前言、內文為臺語文。)
歌手謝銘祐唱：「可憐的阮青春，悲哀的命運。」
熟似的旋律一響起，予人不止仔懷念。由謝銘祐等音樂人，重現寶島歌王的經典作品。本名王瑞河的文夏，佇臺南麻豆出世，舊年4月佇睏夢當中過生，享壽94歲。文夏一生共貢獻予臺灣的音樂界，為著欲紀念伊佇臺語音樂的成就，市府提著文化部補助經費兩千萬，來設立文夏故事館，文化部長嘛藉這个推捒本土語言。
文化部長史哲表示：「除了臺語歌曲繼續創作發展之外，其實咱這馬嘛面對一个咱臺語文，愛保存關鍵的時刻，我相信咱除了聽、講、創作以外，咱上起碼，愛予臺語主流化。」
文夏一生製作1200塊台語歌曲，是臺語流行歌曲的重要推手。伊在生的時，上掛念就是故事館的成立，佇親人佮各界的拍拚之下，選佇20文夏的生日，佮逐家來見面。文夏故事館內有七大主題，紀錄文夏老師精彩的一生，像講有文夏的歌仔冊、相簿，閣打造文夏的房間，另外嘛將文夏經典唱片的曲盤展示出來。
文夏牽手文香表示：「完成文夏老師，上尾的遺願、嘛是伊的心願。」
民眾懷念：「逐工若做工就攏會轉，收音機就會轉予放，放文夏的歌。」
文夏佇歌壇、影壇攏有真好的成績。佇麻豆總爺藝文中心，成立文夏故事館，運用影音技術，予歌迷有沉浸式體驗。雖罔文夏離開咱矣，毋過伊對音樂的堅持和熱情，攏留佇逐家的心中，逐家嘛會永遠會記得寶島歌王，對臺灣樂壇的付出。
張曼亭/編輯
