全中運網球資格賽 疑似場地無平害球員扭著

昨昏受傷的選手跤去跩著，連行路攏愛別人扶插，另外一个選手嘛佇早起的比賽中，因為場地問題受傷。

受傷選手表示：「因為沙仔無鋪平，摩擦力較細會當用跙的，毋過到無沙仔的草埔彼爿，我就雄雄予擋牢矣，就因為按呢跤才去跩著。」

受傷選手家長表示：「主辦單位真無用心，因為佇比賽前一工，阮閣看著照相片，第四面的場地竟然猶未做好。」

昨昏受傷的選手，原本欲用這擺比賽的成績保送高中，煞因為受傷嚴重只好退出比賽。

高市福山國中學務主任簡志源表示：「應該是佇比賽的前一工才舒好，嘛無確定敢有完成所謂驗收的程序。」

承辦這擺比賽的新竹縣政府表示，選手受傷原因主要應該是沙舒的量無夠，會請包商趕緊改善。

新竹縣教育局體健科長張晉嘉表示：「這改選手受傷的部份，上主要的問題是沙無舒予夠的部份，會要求相關單位比賽煞一定愛留落來，共場地的沙舒予好勢。」

學生辛苦練習準備比賽，這馬煞因為受傷影響成績，學校方面要求主辦單位，除了愛負責醫藥費，而且將受傷選手的賽程延後，保障選手的權益。