西拉雅釋憲成功 原民身分法違憲.3年內愛修法
郭柏均 張育睿／臺北報導
發布時間：
更新時間：
目次
西拉雅釋憲案，憲法法庭今日公佈判決結果，15位大法官攏同意，判決《原住民身分法》第2條第2款違憲，對宣判日開始算，3年內，相關單位著完成修法。原委會也咧煩惱講，這項判決結果，平地原住民可能會增加70萬人，會影響著現有原住民的權利。
佇司法院門口演奏竹仔鼓，西拉雅族人面容攏是歡喜的表情，因為28憲法法庭針對西拉雅身份案的判決，in總算會當得著原住民身份，而且是以15个大法官全數同意，真罕得見的狀況通過判決。
關係人萬淑娟表示：「15个大法官，一致共識之下的歷史大案，予阮佇這个勝利的滋味內底，有講袂出的感動，猶有對這塊土地，對這塊土地，深深的感謝。」
大法官認為，若是族群猶有保留文化、族群認同也維持、閣有客觀歷史紀錄的南島語系民族，就會使按照民族的意願，申請核定做原住民。也就是西拉雅族人、等等族群若符合要件，就會使申請成做平地、山地原住民以外的其他原住民。
憲法法庭書記廳廳長許辰舟：「本判決是以憲法的意旨，具體化原住民族的認定標準，除了予一定的立法抑是修法的期限，3年期限以外，若是修法無法度佇3年完成，佇立法抑是修法進前，嘛予其他台灣原住民族，會使請求核定做原住民族，按呢的請求權，關係人 萬淑娟，阮希望行政院會當佇限期內，展開佮平埔族群，佮西拉雅的對話。」
原民會對判決表示尊重，表示會按照釋憲結果立法抑是修法。雖然這擺的判決，予西拉雅族人登記做原住民身份的機會，但是並無等於in會使得著平地、抑是山地原住民的特別參政席次，原住民族其他特別福利保障的部分，因為牽涉著資源分配，也是愛看法條按怎定，才會使確定in會使得著佗一寡權利。
專題｜改造地獄路 台灣行人路為何難行？
