狗仔是咱人類上貼心的朋友，作家儲玉玲、儲嘉慧姊妹仔，最近是出版台語的繪本，號做《咱的日子》，用厝內13歲的狗仔伴做主角，描寫出伊逐工陪伴主人，慢慢仔變老的一生。
台文繪本用老狗做主角，用動物的角度講出陪伴佇主人身軀邊，隨日子沓沓仔老去，這種恬靜溫柔的情感。
作者 儲玉玲講：「人參人，抑是人參動物，做伙互相陪伴，然後這款蓋深的感情，這款足平常、足平凡的，咱生活就是按呢。毋是啥物大風大湧彼款代誌」
作者共小妹佮厝裡老狗的互動做記錄，寫做《咱的日子》這本冊，描繪狗除了像厝裡的人，也反映序大人對身體退化等等心內的想法，希望讀者感受這種互相陪伴到老的過程。
出版社童書企劃主編 周彥彤表示：「IN寫的是人參動物之間的感情，這其實是較少無毋著，而且彼狗仔閣是足老的狗仔，所以阮也收著足濟看過冊的人，回饋講真正看到一半會流目屎」
繪本除了台文也有華文對照，作者表示，主要就是欲予親子共讀的時通做輔助，出版社也表示，這幾冬有真濟台語底的作者用母語寫冊，像咱的日子，用平常時講話的氣口呈現，除了希望文字閣較貼近原意、也予讀者閣較有感覺。
