中正大學紀錄片影展 看見中國掩崁的勞權問題
林緯廷 嘉義報導
發布時間：
更新時間：
目次
中國佇2000年過後，有一寡仔記錄社會佮經濟發展的獨立影像，煞因為受著中國政府打壓，無法度公開放送，中正大學人權佮永續發展中心這陣參佮國家人權博物館合作，舉辦「中國獨立紀錄片、巡迴影展」，這改用「勞動人權」做主題，欲佇6間學校，放送14場。
為著欲予學生透過影像的紀錄，認捌勞工人權的議題，嘉義中正大學人權佮永續發展中心舉辦「中國獨立紀錄片巡迴影展」。開幕第一支影片是以塵肺症做主題，嘛入圍今年金馬獎最佳紀錄片「塵默呼吸」。
中正大學楊同學表示：「予學生知影，佇這个四序箍仔外口的世界是啥款，所以我感覺伊會當予學生毋免出門，但是會當了改外口的世界。」
中正大學社會科學院長 王安祥表示：「透過這勞工人權的影展，會當有一个平台，會當共一寡仔勞動方面的，人權的普遍價值傳播出去。」
影片記錄塵肺症患者的困境佮生活，導演希望透過鏡頭，予逐家知影中國勞權的問題。策展的導演表示，這種議題的紀錄片，目前攏無法度佇中國來放送。
人權與永續發展中心客座研究員黃文海表示：「無仝意見的色彩，就變作中國政府維穩的對象，所以IN就開始，2011、2012年就開始來打壓，2013年以後，基本上中國就袂當有這種，獨立影片的影展，自由來放送。」
這改的影展，有揀6齣中國的獨立紀錄片，中正大學人權與永續發展中心指出，目前台灣是華人世界內底，誠難得會當看著遮的影片的所在，紲落來閣會去5間大學巡迴放送，推廣勞工人權，嘛予受著打壓的事實會當出聲。
專題｜改造地獄路 台灣行人路為何難行？
