全教總接著檢舉 大葉退休教授黃德祥開校長培訓班

全教總理事長 侯俊良表示：「同德高中開設的課程，費用竟然懸過師培大學，佮國教院的開的課程，收費3萬6。」
講甲生頭凊面，全教總理事長侯俊良特別強調，大葉大學退休榮譽講座教授黃德祥，以個人名義佇南投同德高中開設校長培訓班，費用毋但傷過懸，而且培訓班所倩的講師，互相攏有熟似，懷疑礙著利益迴避的問題。
全教總理事長 侯俊良表示：「考試遴選需要遮的人考煞了後，學校辦一寡仔計畫，學校做訪視、評鑑，甚至做一寡仔計畫，也是仝一陣人去，高度重疊。」
受指控的黃德祥教授接受電話訪問，認為這款的指控傷過嚴重，會當開校長培訓班是好代誌，
大葉大學榮譽講座教授 黃德祥表示：「傷嚴重矣啦！是好事一件，應該值得表揚才著，共教育的種子湠開，有一寡親像善緣啦！」
全教總高中職委員會主委 張瓊方表示：「若準今仔日真正是因為公益、奉獻，其實講真的，逐家就以做義工的心態毋通收費。」
開設校長培訓班，真濟學校攏有咧做，全教總呼籲教育部，愛調查培訓班的學費佮師資，若準有牽涉利益關係，應該要求相關的人退出校長遴選的計畫。