地動致嘉義有學校必巡 學者:著重視斷層研究

相連紲兩工發生地動，教室內底出現一條大必巡，為著學生的安全，鹿草鄉重寮國小的教室這馬暫停使用。

重寮國小校長林杏芳表示：「這款狀況阮就通報予頂面的主管單位，然後這間教室佇地動了後，就請學生莫來使用，就共學生徒去多功能教室去。」

嘉義縣教育處長李美華表示：「特別呼籲學校，愛趕緊共相關的災情送入來，阮會第一時間來協助，會用災害準備金來協助，鬥相工恢復學校。」

嘉義縣教育處目前當咧調查縣內學校受損的情況，嘛有派人去處理。成功大學有教授呼籲，嘉南地區愛注意地動的發生，國立中正大學研究地動的教授也提醒逐家，思考地動發生的時愛做啥物閣較重要。

中正大學地球與環境科學系教授温怡瑛表示：「像昨昏發生佇台東這个地動，連台北 桃園攏有誠強的感受，甚至桃園有一寡仔建築物，有受著災害的問題，所以基本上大地動來的時陣，伊佇佗位發生並毋是遐重要，顛倒是咱會當做啥物。」

中正大學研究地動的團隊表示，台灣本身就是定定地動的所在，而且只要大地動發生，規台灣攏會有感覺，研究斷層需要時間佮政府相關單位的資源，才有法度沓沓仔來進行，目前上重要的代誌，就是提升民眾正確的防災觀念。