網媒辦青年參政論壇 招各政黨發表主張

年底毋但有地方公職人員選舉，嘛欲做伙辦18歲公民權修憲案的複決公投。18有網路媒體以青年參政為主題，舉辦論壇討論。下晡立法委員、也是國民黨臺北市長參選人蔣萬安到現場，針對現行民代組成方式對青年敢有友善，進行討論。

國民黨臺北市長參選人 蔣萬安表示：「對真濟角度來看，制度對少年朋友確實無遐爾友善，不管是保證金、組成方式，對地方議會的議員來講，咱會使看著少年人的比例並無懸。其實若是政黨有願意，(不分區)加提名一寡仔少年人，共伊排名較頭前，其實也是對少年朋友的重視。議員不分區，是毋是會使增加少年人參政的機會」

蔣萬安2點半離開，民進黨臺北市長參選人陳時中3點隨到，以按怎放冗青年參政限制為主題來分享。

民進黨臺北市長參選人 陳時中指出：「有年歲的限制，抑是學歷的限制，未來佇網路的世代、資訊透明的世代，這个狀況無應該存在，資訊透明閣做任何的限制，我認為攏是歧視。我認為上好的方式就是公民加強監督，全體對候選人的監督，我想這是一个上有效的方法」

民眾黨嘛有桃園市長參選人賴香伶來參加，伊針對青年被選舉權按怎放冗，提出以立法來引起釋憲的想法。

民眾黨桃園市長參選人 賴香伶表示：「公職人員選舉罷免法，佮總統副總統選舉罷免法，敢有可能做陣共投票的年歲修法，若是佇立法院通過，致使佮憲法130條的修正(衝突)無過，會成做法律的相牴觸，會使佇憲法法庭作法律的解釋佮審定，彌補修憲的懸門檻」

三黨政治人物嘛攏閣一擺喝出支持18歲公民權修憲案，按怎以青年議題唌少年人的支持，成做各政黨的重視的課題。