臺灣人權攝影展 看原住民.移工.性別拚平權

相片內底是36年前引起大眾關注的鄒族原住民湯英伸事件、另外一張是禮拜時滿滿攏是移工的台北車頭。國家人權委員會舉辦攝影展，用一張一張的相片講出台灣人權的進展。
參展的其中一个攝影師黃子明，三十外年前捌翕過原住民族正名運動；前幾冬，伊重新用鏡頭，記錄遮的運動者現在的生活。
攝影師 黃子明表示：「想欲轉去揣看覓，這三十年來我所翕過的當事人，我想欲看怹這馬的模樣，到底三十年的原住民運動對怹的影響是啥物。」
這改攝影展除了原住民族以外，嘛有性別平等佮移工的主題相片。國家人權委員會主委陳菊表示，8月初1拄好是委員會成立兩週年，希望無仝族群的人佇台灣攏有平等的權益。
國家人權委員會主任委員 陳菊表示：「遮的權利，咱攏是徛佇前人的肩胛頭頂懸，一代一代的努力才有今仔日。」
陳菊講，人權永遠攏進步無夠，委員會會繼續自我要求佮反省。