商滿生受威權迫害 後代設紀念館以228註冊商行
陳嘉筠 賴威佐 / 台南報導
發布時間：
更新時間：
臺南市民權路有一棟80年的老厝，最近用228來註冊商行的名，這毋但是一間店，也是商滿生紀念館。商滿生是第一批臺獨人士，228事件予人掠去關三冬外，家族是共財產賣了了才共人救轉來。這馬伊的後代成立紀念館，欲用文化行動，𤆬少年人認捌歷史，參與公共事務。
日本時代佇台南出世的商滿生，捌去東京讀帝國大學，轉來台灣參與社會民主運動，228事件了後，伊因為𤆬領學生遊行抗議，佮湯德章律師仝一工予人掠去關。
商滿生的孫女 商毓芳：「阿公是南英校長，彼工戒嚴出來經過警察局，予人掠入去。就開始賣厝來銀行換金條，開始去揣人，是用足濟足濟金條共人揣著。」
商毓芳講，伊是36歲才知影阿公的故事，商家佇舊城區一寡仔厝業攏賣了矣，伊開始整理阿公的相片佮資料，轉來民權路揣著這間80年的老厝，成立紀念館，用門牌的倚音登記做228商行。
商滿生的孫女 商毓芳：「不是干焦紀念家已的阿公，紀念彼時陣阿公所有的朋友。咱𤆬少年人，共咱知影的物件，和少年人做伙、做伙認同。」
商毓芳佮這陣少年人親手修補這間老厝，嘛拍算欲設計一寡仔藝文行動佮桌仔奕。
228商行成員 郭宸志：「用一種較輕鬆的方式去了解歷史，就佇遮耍。阮會當𤆬看阮的展覽，看咱是按怎修理這間厝。」
紲落來in閣想欲推廣台語、拍台語電影，身為228事件的第三代，商毓芳希望鼓勵少年人，關心咱的土地，用行動參與公共事務。
2022杭州亞運 台灣百金之路
