隆興閣五爪金鷹展覽 說當年金光布袋戲風光
鄭雅文 林郁凱 / 新北報導
發布時間：
更新時間：
金光布袋戲誠出名的雲林隆興閣掌中劇團，這半冬來，共一寡戲尪仔借予新莊文化藝術中心展覽，戲迷會當佇遮看著上出名的五爪金鷹，這齣戲相關的家私，也通了解著金光布袋戲的歷史演變。
50年代雲林隆興閣掌中劇團的五爪金鷹戲齣，袂少戲迷到今猶是真懷念，真濟戲內底出現的尪仔佮家私，這陣當咧新莊文化藝術中心展出。
新莊文化藝術中心主任 莊雅雯：「阮當咧展出隆興閣掌中劇團，佇無仝時期的戲偶佮道具的演化，甚至為角色加添機關科技，稀奇古怪的車、轎、怪獸等等，也佇遮有意義的展出。」
一身尪仔有半个人遐懸、色水艷、面形特殊，是金光布袋戲的特色，隆興閣講彼陣對傳統古冊戲，轉變做金光戲，除了尪仔變大身、聲光音效布景等等，也無親像傳統的鑼鼓弦吹 ，閣較因為劇情天馬行空，一時成為逐家真好玄的娛樂，也是一个時代的共同記持。
隆興閣掌中劇團長 廖昭堂：「因為五爪金鷹出來，喊一聲人就變血水，彼當時的時代，遐的觀眾講哪有遐譀，喘一个氣人會變血水，愈譀IN煞愈愛看，就一直編落去到這馬按呢。」
隨潮流改變，金光布袋戲的尪仔也愈做愈幼路，因為團長廖昭堂是詔安客家子弟，閣較將台語布袋戲加添客語的版本，推廣客話的布袋戲，嘛到學校教囡仔弄戲。廖昭堂表示，布袋戲雖然已經無以早的光景，但猶是希望這个傳統文化，通繼續維持。展覽會展至這個月19。
2022杭州亞運 台灣百金之路
