教育部欲修法 准2歲囡仔去綴3-4歲班級上課

教育部初二佇公共政策網路參與平台預告，欲修改幼兒教育及（kap）照顧法施行細則，予2歲的囡仔會使佮3歲以上、無滿4歲的囡仔佇仝一班。才公告一禮拜的時間，網路就有萬外筆的討論，反對立場佔大多數。初九全國教師工會總聯合會佇教育部頭前開記者會，表明反對的態度。

全教總理事長 侯俊良表示，「兩歲的囡仔伊需要閣較濟的照顧。兩歲佮三歲干焦差一歲，毋管是身體的訓練抑是各方面的訓練，攏真需要人去關照。」

全教總幼教委員會主委 楊逸飛，「兩歲的過程若是無人共輔導，佇上便所佮食食生活的照顧上，絕對會影響著伊的人格發展。」

平台嘛有家長表示，煩惱大細漢囡仔同齊上課，較有可能發生危險。全教總舉例，2歲專班佮3歲以後的幼兒園班級，各款要求攏無仝；親像2歲專班要求便所愛設佇教室內底，3歲以上免；2歲專班一班上濟16人、3歲以上會使到30人。

教育部國教署學前教育組組長 王慧秋表示，「這个幼兒園內若是無兩歲專班抑是兩歲專班已經滿矣，但是伊的三歲專班猶有位，著愛幼兒伊欲滿三歲的彼個月，伊才會使入班。」

教育部表示，是愛滿足一定的條件，才會是這擺修法的適用對象。嘛強調，教育部會繼續收集各界意見，進行修法的研議。