消防員加班費上濟萬7 超過只通換嘉獎被質疑

三月份桃園的物流中心、倉庫,閣有台北的大學相連紲發生火災,負責救災的消防人員權益閣再受著關注。因應大法官釋字785號解釋,消防署擬定工時試辦計畫,但是消防員工作權益促進協會表示,計畫內底猶是無廢除加班時數換嘉獎的無合理規定,嘛要求廢除警消加班費每個月17000的上限。

消防員工作權益促進協會常務監事 藍毓傑:「若是加班費領到盡磅,伊的時數是會予保留,你會使選擇變成嘉獎抑是補休,伊補休會佮年度特休衝突,所以其實你嘛歇袂著補休,上尾仔伊可能兩年到就無去,抑是你願意換記嘉獎,」。

人事行政總處培訓考用處副處長 莫永榮:「行政獎勵的部份,伊是保訓會徵詢機關的意見訂的,阮人事總處是尊重」。


協會表示,目前消防人員每個月的工時上懸可能會到480點鐘,按照目前消防署的規劃,猶是可能超過300點鐘;協會肯定新的方案有降低工時,但是要求每個月工時包含加班,莫超過236點鐘。綜合加班費的問題,in要求消防署回應。

消防署副署長 馮俊益:「已經正式要求各縣市,佇in轄區選幾个分隊,實際對3月開始試辦,每兩個月攏會來做檢討,人力消防充實方案,基本上咱佇112年一定會使達標」。

面對協會佮記者提問,消防署並無正面回應協會對工時上限佮加班時數換嘉獎的疑問,干焦表示會繼續觀察成效來修正。



 

全台敬老金大調查

相關新聞