鼓勵生囝 高雄公托人員加薪4600.佮雙北領平濟
陳嘉筠 賴威佐 / 高雄報導
發布時間：
更新時間：
高雄市府鼓勵民眾生囝，今仔日閣宣佈，公共托育人員對這個月會加薪水到4千6百箍，廚房人員嘛加2千箍。托育機構人員表示，因為這幾冬公立的幼教人員薪水福利增加，搝人才離開，希望這擺加薪水會當共人留落來。
高雄公共托嬰中心，一班才16个囡仔，配四个老師，環境算袂䆀，毋過無到兩歲的幼囝實在歹照顧，高雄市府宣佈欲替遮的托育人員加薪，對目前起薪三萬箍，增加到三萬四千六百箍，另外廚房人員嘛加薪兩千箍，估算有三百五十六人受惠。
高雄市長 陳其邁：「因為佮準公共化的幼教人員薪水，差距大概有四千到六千箍左右，造成揣托育人才無容易」。
廚工：「對阮的工作有肯定，予阮愈有動力為托嬰中心服務」。
加薪了後，高雄的公托人員薪水就佮台北、新北仝款，其實對公共托育中心來講，這幾冬確實無法度共人留落來。
新興公共托嬰中心主任 林奕寧：「幼稚園這塊，因為調的幅度比阮較緊真濟，這馬嘛是會煩惱，誠無簡單培力起來遮的專業人員，可能會往幼稚園去」。
市府毋但增加托育人員福利，目前28間公共托育機構，今年欲增加到53間，台灣已經連紲兩年人口負成長，今年閣拄著虎年，高雄打造友善育囝（io-kiánn）的環境，希望增加少年爸母生囝的意願。
2022杭州亞運 台灣百金之路
