新竹市通過啉好水公投 民團籲定條例管垃圾水

新竹市的公民團體佇舊年底發起的「食好水」公投案,得著13萬張同意票來通過,今仔日這寡團體也來到市政府,提出𪜶所規劃的「廢污水管理自治條例」草案,呼籲市政府趕緊訂出自治條例,送到市議會完成立法。

公民團體表示,舊年底「啉好水」公投結果,同意票超過13萬票,可見民眾對新竹水質有偌爾重視,希望市府應該依照公投結果,訂出廢污水管理自治條例。

社區大學代表表示:「頭前溪是大新竹的母親,阮希望頭前溪的水質會使閣較好,廢汙水會使分流排出去。」

台灣乾淨水聯盟召集人,彭桂枝表示:「希望市政府會使停落來做苦工,去共灌溉用水參啉的水,水源有佗一寡汙染源會使整理出來,希望這部份市府愛努力,毋是單純幫逐家調水來,因為調自來水並毋是公投案主文。」

除了自治條例,公民團體嘛要求設置廢污水污染管理委員會,統一水質管理的代誌,除了公民代表,各黨團嘛來到現場,表達對「啉好水」的支持。

台灣乾淨水聯盟召集人,彭桂枝表示:「會使成立專門的委員會,來予水質管理會使佇第四權頂頭一致,予民眾真正有好的水質,會使得著水源完整的保障。」

針對訴求市府表示,目前已經開始自治條例的準備作業,會統整市民、民間團體以及專家意見,13彼工會邀請民間團體做伙參與會議。

相關新聞

專題|全台敬老金大調查