獎勵臺.客等國家語言講課 臺師大:鐘點費加5成

臺師大的教授用台語咧教語言學概論，這種上課方式未來會閣較濟。因為學校推動多語化，下學期開始，老師若是用台語、手語、原住民語、客語等等國家語言授課，就會當有獎勵金佮教材的補助。

國立臺灣師範大學教務長 劉美慧講，「這个獎勵金就是講阮的授課的時數的50%，就會使提著這个獎勵金，希望用這个獎勵的方法，予閣較濟的學生願意認同家己的母語，予家己的語言講閣較輾轉。」

臺師大表示，學校最近通過國家語言發展授課的獎勵實施方案，自新學期開始對選修的課程來試辦、也會佇課程大綱註明使用的語言，已經有一寡老師表達有意願。毋過相關語言的語言課就無佇獎勵內底。只是有人也驚講這款上課的方式，恐驚會有學生袂慣勢、會聽無。

國立台灣師範大學台文系主任 許慧如講，「學生咧修課的時伊就知影講這个課是啥物語言來上的，確實有學生就是為著欲聽台灣話來上這个專業的課程，過幾年仔免偌久的時間，逐家就會較慣勢，這對台灣的多語文化是一个真好的實踐。」

台文系主任許慧如表示，學校行這一步有真大的意義，就是予母語毋但是用來講、也通深化佇專業領域8。臺師大也指出，辦法實施了後，也會閣看師生的反應做調整。