唯一第5案 新竹市"啉好水"公投望廢水專管排放

新竹市是全國唯一有5張公投票的縣市，加出來的第五張票是台灣清氣水行動聯盟發起的「啉好水」地方公投，主要是希望新竹市會使訂廢汙水管理自治條例，規定工業、醫療事業廢水，設專門的管線回收。

透早8點就已經有人排佇投票所外口，準備投票，這改的公投新竹市比別的縣市，加一張「啉好水」公投票，選務人員無敢靠勢，就驚會拖長投票的時間。地方民眾嘛對這項全國唯一的公投真關心。

去投票的民眾表示，「動線誠順無問題，（自入去到出來的時間）差不多2分鐘。畢竟是佮啉的水有關聯，若是欠相關辦法，欲定我感覺是誠合理。」
民眾對這个議題是真關心，「對身體有啥物影響毋知，（所以真關心啉好水），著。」

發起人表示，「啉好水」公投，是直接佮人民生活有關聯，希望政府聽著公民的聲音。

啉好水公投案領銜人彭桂枝講「感覺真感動，透早猶無八點就有誠濟民眾來排隊。阮希望透過這改的公民投票，尤其是佮新竹市有關的地方公投，逐家會使認真去思考，有關水環境治理，公民會使投啥物款的票。」

根據選委會統計，新竹市有35萬7千外人有投票權，除了同意票需要比無同意票濟，嘛愛有超過89270張同意票，「啉好水」公投才會使過關。