學校拄搪疫情線頂教學 偏鄉資源欠缺挑戰大

今年年中當咧疫情緊張,學校攏改做線頂教學。毋過對偏鄉的家庭來講是誠艱苦,可能𪜶無設備抑是厝內無網路,嘛有可能是無相關的智識袂曉使用。

「拍開鏡頭予老師看著家己,提出課本佮鉛筆、拭仔,然後開始上課。」

佇咧烏暗的環境上課,無電腦、干焦會使睨手機仔,這是偏鄉囡仔佇疫情期間的日常。根據兒童福利聯盟統計,因為疫情需要線頂教學的時,只有3成的偏鄉囡仔有家己的電腦抑是平枋電腦,2成的囡仔干焦會使使用手機仔上課,就算有設備,嘛干焦大概一半的囡仔厝內有網路通使用。

彰化天盛國小學生表示:「我使用的設備是爸母的手機仔,佮厝內的筆記型電腦,但是因為阮兜嘛閣有別人佇線頂上課,所以定定會網路斷線。」

彰化天盛國小校長,陳東漢表示:「借來的物件、軟體的配備,佮學校線頂學習的教學,事實上是有差別的,阮學區的家長針對這方面,其實數位能力無遐爾好。」

行政院今年11月推動「逐班有網路,逐人用平枋」政策,希望予偏鄉學校每个學生攏有平枋電腦通使用。毋過聯盟表示,就算學校有網路、學生有平枋電腦,嘛可能拄著學生厝內無網路通用等等的問題。

兒童福利聯盟執行長,白麗芳表示:「就算是借平枋電腦轉去厝內,猶是有連線的問題,抑是敢會曉操作的問題,偏鄉的囡仔若是以前並無習慣,數位學習抑是用網路,臨時拄著疫情真正是有困難。」

聯盟建議中央平常時應該著先安排學校演練,排除線頂學習定定拄著的各種問題,確保學生的學習權利。

全台敬老金大調查

相關新聞