新竹有少年設海洋巡守隊 收集海洋糞埽變樂器

新竹有一陣少年為著提醒民眾、重視海洋汙染的問題,成立一支海洋巡守隊,六年來固定舉行摒海埔的活動,閣共海邊抾來的浮筒球仔,重新改造變做樂器。


新竹有一陣少年為著提醒民眾、重視海洋汙染的問題,成立一支海洋巡守隊,六年來固定舉行摒海埔的活動,閣共海邊抾來的浮筒球仔,重新改造、變做樂器。

利用海邊抾來的浮球,改造成沙鈴參鼓,演奏出好聽的樂曲。這陣來自新竹縣市的囡仔,攏是海洋巡守隊的隊員,逐家透過收集來的海洋糞埽,創作出特別的樂器。
香山少年團員:「按呢就毋免用買的,較環保嘛真有藝術價值」。

香山少年團員:「因為平常時買鼓誠貴,用這來做較環保」。

香山少年團長張淨寬:「真濟廢棄物創作干焦好看爾,阮希望除了裝飾以外,是會使用來耍的,是會使陪囡仔做伙成長」。


香山少年環保巡守隊,是在地民眾自發成立,到今已經6冬外,目前新竹市除了閘斷河川糞埽,來減少海洋汙染,佇海域的部份就交予環保巡守隊負責,今年揣來30個家庭,做伙清除超過35噸的海洋廢棄物。
新竹市環保局長江盛任:「會使予逐家更加重視,清理海洋廢棄物的重要性,希望透過逐家的力量,共海洋摒清氣」。


這陣少年人,透過清除海洋糞埽的過程,親身感受海洋污染的嚴重,嘛感受海洋環境教育的重要性,巡守隊會繼續做伙守護海洋資源。


 

相關新聞

專題|全台敬老金大調查