社區藝術空間拚改造 招序大畫布旗參與在地

社區的序大用蠟筆佇布旗仔頂面畫圖，有人畫西瓜、有人畫番麥，逐家攏誠專心，希望用遮的布旗仔，來妝娗義竹鄉。

嘉義縣義竹鄉岸腳社區，吳女士表示：「畫、畫這，畫弓蕉、畫魚仔，逐項攏嘛有。」

嘉義縣文觀局為著欲發展偏鄉的藝術風氣，邀請社區營造團隊，來義竹鄉改造藝術空間，閣舉辦鄉民藝術行動工作坊，予社區的序大有趣味的體驗。

嘉義縣義竹鄉岸腳社區，翁先生表示：「較袂講按呢，電視看落就予電視看，佇遐就按呢，戇戇佇遐坐，所以阮這是誠感恩，感恩遮的各位老師、理事長。」

嘉義縣義竹鄉岸腳社區理事長，涂院生表示：「這个裝置藝術，畫圖活動，遮的阿公阿媽，閣加一个畫圖的藝術出來，𪜶逐家感覺足歡喜。」

有序大佇畫好的框內底擦色，嘛有序大那看草稿那用鉛筆畫，社區營造團隊講，岸腳社區誠濟5代的家庭，但是留佇遮毋是上老，就是上細漢的，予序大來參與社區的改造，對𪜶來講毋但是趣味，閣有對𪜶在地精神的認同。